देउवा समूहको नगर सभापति दौडबाट मैनाली पछि हटे, ‘प्रलोभनमा परेकाहरूको भीडमा बस्न नैतिकताले दिएन’

निजगढ । नेपाली कांग्रेसको १५औँ महाधिवेशनअन्तर्गत निजगढ नगर सभापतिका लागि देउवा समूहबाट चर्चामा आएका युवा नेता खड्गराज मैनालीले नगर अधिवेशनमा सक्रिय सहभागिता नजनाउने बताएका छन् । समूहगत राजनीतिक समीकरण, क्रियाशील सदस्यता वितरण र नेतृत्व चयन प्रक्रियाप्रति असन्तुष्टि जनाउँदै उनले नैतिकताकै कारण आफू त्यस्तो प्रतिस्पर्धामा सहभागी हुन नसकेको बताएका हुन् ।

मैनालीले गगन थापा समूहमा रहेका केही व्यक्तिले राजीनामा दिएर देउवा समूहमा प्रवेश गरेको विषयप्रति असन्तुष्टि जनाएका छन् । उनका अनुसार नैतिकता कमजोर पारेर, विभिन्न प्रलोभनमा परेर तथा आर्थिक स्वार्थका कारण समूह परिवर्तन गर्नेहरूको भीडमा बसेर राजनीति गर्न आफ्नो नैतिकताले नदिएको आशय छ ।

उनको यो अभिव्यक्तिले निजगढ कांग्रेसको देउवा समूहभित्रको राजनीतिक समीकरण र नेतृत्व चयन प्रक्रियाबारे प्रश्न उठाएको छ । यद्यपि, समूह परिवर्तन गर्ने व्यक्तिहरू आर्थिक प्रलोभनमा परेको भन्ने विषय मैनालीको आरोप रहेको छ ।

क्रियाशील सदस्यता वितरणमा विधि मिचिएको आरोप

मैनालीले क्रियाशील सदस्यता वितरणमा विधान र विधिसम्मत प्रक्रियालाई प्राथमिकता दिनुपर्ने बताएका छन् । वैधानिक प्रक्रियाबाट आएका क्रियाशील सदस्यलाई प्राथमिकता दिनुपर्नेमा जथाभावी नयाँ सदस्यता वितरण गरिएको उनको आरोप छ ।
पार्टीको आन्तरिक निर्वाचनमा सदस्यता वितरण पारदर्शी र विधानसम्मत हुनुपर्ने उनको धारणा छ । सदस्यता वितरणमै प्रश्न उठेको अवस्थामा त्यसकै आधारमा हुने नेतृत्व चयनले पार्टीको आन्तरिक लोकतान्त्रिक अभ्यासमाथि असर पार्न सक्ने उनको असन्तुष्टि छ ।

सहमहामन्त्री चौधरीलाई जानकारी

यसअघि देउवा समूहबाट निजगढ नगर सभापतिका लागि मैनालीको नाम चर्चामा आएको थियो । उनलाई उम्मेदवारका रूपमा अघि सार्ने विषयमा छलफल भइरहेको चर्चा चले पनि मैनालीले आफू पदका लागि दौडधुपमा नरहेको स्पष्ट पारेका छन् । उनले नगर अधिवेशनमा सक्रिय रूपमा सहभागी नभएको र आफ्नो उद्देश्य बजारमा चलेको चर्चाजस्तो नरहेको बताएका छन् । आफ्नो धारणा नेपाली कांग्रेसका सहमहामन्त्री उमाकान्त चौधरीलाई समेत जानकारी गराएको मैनालीको भनाइ छ ।

मैनालीको निर्णयसँगै देउवा समूहबाट निजगढ नगर सभापतिका लागि उनको सम्भावित उम्मेदवारीबारे चलेको चर्चा रोकिएको छ । उनले उठाएका क्रियाशील सदस्यता वितरण, समूह परिवर्तन र राजनीतिक नैतिकतासम्बन्धी प्रश्नबारे भने सम्बन्धित पक्षको प्रतिक्रिया आउन बाँकी छ ।