५६औँ भूटनदेवी थानीमाई मेला भव्य तयारीसहित मंसिर १७ देखि १९ सम्म

रामथली (निजगढ–१२) खयरखोला भूटनदेवी क्षेत्रमा लाग्ने परम्परागत भूटनदेवी थानीमाई मेला यस वर्ष पनि भव्य रूपमा आयोजना हुने भएको छ । मेला व्यवस्थापन समितिले मंसिर १७ देखि १९ गते चल्ने ५६औँ संस्करणका लागि सम्पूर्ण तयारी सम्पन्न भएको जानकारी दिएको छ ।

समितिका अनुसार यस वर्षको मेलामा धार्मिक विधि–पूजा, सांस्कृतिक प्रस्तुति, नृत्य–संगीत र स्थानीय उत्पादन प्रदर्शनी विशेष आकर्षण रहनेछन् । मेलालाई आकर्षक बनाउन लोकप्रिय गायक/गायिका ज्योती मगर, संजिव घिसिङ्ग र विरु घलान तथा विभिन्न स्थानीय कलाकारहरूको प्रस्तुतिसहित तीन दिनसम्म निरन्तर सांस्कृतिक कार्यक्रम सञ्चालन गरिने भएको छ ।

मेला व्यवस्थापन समितिका अध्यक्ष दिनेेश लामाले मेलाको तयारी सन्तोषजनक रहेको बताए ।
उनले भने, “भूटनदेवी थानीमाई हाम्रो आस्था, संस्कृति र पहिचानको केन्द्र हो । हामीले मेलालाई व्यवस्थित, सभ्य र आकर्षक बनाउन सबै पक्षसँग समन्वय गरेका छौँ । यस वर्ष दर्शक र भक्तजनहरुको ठूलो भीड आउने अपेक्षा छ ।”

समितिले धार्मिक परम्परा जोगाउने उद्देश्यसमेत स्पष्ट गरेको छ । अध्यक्ष लामाका अनुसार मेलाको समापन भोलिपल्ट विगतदेखि चलिआएको परम्परा अनुसार बोका, कुखुरा लगायतका पशुपक्षी बलि दिने विधि यथावत राखिनेछ ।
उनले थपे, “पूर्वजले चलाआएको विधि र संस्कारलाई निरन्तरता दिनु हाम्रो दायित्व हो । बलि चढाउने धार्मिक परम्परालाई सम्मानपूर्वक पालन गरिनेछ ।”

मेलामा स्थानीय संस्कृति, धार्मिक आस्था, पर्यटन प्रवर्द्धन र आर्थिक गतिविधि सक्रिय पार्ने अवसरसमेत हुने समितिको विश्वास छ । विभिन्न संघ/संस्थाको सहयोगमा कार्यक्रम व्यवस्थित र सुरक्षित बनाउन आवश्यक तयारी पूरा भइसकेको समितिले जनाएको छ ।