क्रियाशिल साकोस १४औँ वार्षिक साधारण सभामा अध्यक्षद्वारा प्रस्तुत प्रगति प्रतिवेदन

आदरणीय अतिथि, विशिष्ट अतिथिज्यू, सहकारीका शेयर सदस्य, बचतकर्ता, ऋण लिने–दिने सदस्य, स्थानीय सरोकारवाला, विभिन्न संघ–संस्थाबाट पधारनु भएका अतिथिजन, पत्रकार मित्र, सुरक्षाकर्मी, लेखा संयोजक, ऋण संयोजक लगायत सम्पूर्ण आमन्त्रित महानुभावहरू । क्रियाशिल बचत तथा ऋण सहकारी संस्था लिमिटेडको तर्फबाट तथा मेरो व्यक्तिगत तर्फबाट तपाईंहरू सबैप्रति हार्दिक सम्मान र अभिवादन व्यक्त गर्दछु ।

यस १४औँ वार्षिक साधारण सभामा उपस्थित भइ सहकारीको वार्षिक प्रतिवेदन सुन्न, बुझ्न र समीक्षा गर्न समय निकाल्नु भएकामा हामी अत्यन्त आभारी छौं । सदस्यहरूको निरन्तर साथ, विश्वास र सहकार्यकै कारण हाम्रो संस्थाले विगत वर्षहरूमा प्राप्त गरेका उपलब्धि सम्भव भएका हुन् । आज यही यात्राको तथ्यात्मक, पारदर्शी र विस्तृत मूल्यांकन तपाईंहरू समक्ष प्रस्तुत गर्दैछु ।

१. स्थापना इतिहास र संस्थापकप्रति कृतज्ञता:

क्रियाशिल बचत तथा ऋण सहकारी संस्था लिमिटेडको यात्रा २०६८ साल असार २५ गतेदेखि औपचारिक रूपमा सुरू भएको हो । हेटौंडा डिभिजन सहकारी कार्यालयबाट दर्ता गराई स्थापना प्रक्रियालाई पूर्णता दिनुहुने पहिलो संस्थापक टिमप्रति म आज पुनः हार्दिक कृतज्ञता व्यक्त गर्न चाहन्छु ।
दुर्गम क्षेत्र, न्यून स्रोत–साधन, सीमित प्राविधिक पहुँच यी सबै चुनौतीबीच पनि “सहकारीमार्फत समुदायको जीवनस्तर उठाउने” उद्देश्य बोकेर संस्थापकहरू अघि बढ्नु भएको थियो । आज सहकारीले देखाएको प्रगतिको जग त्यही दूरदृष्टिले नै निर्माण गरेको हो ।

त्यस्तै संस्थाको नेतृत्वमा रही १२ कार्यकालसम्म उत्कृष्ट योगदान पुर्‍याउनु भएका पूर्व अध्यक्ष इन्द्रलाल श्रेष्ठ र उहाँको टिमप्रति पनि हार्दिक धन्यवाद व्यक्त गर्दछु । उहाँहरूको निरन्तर प्रयास, समर्पण र कठिनाइमा पनि सहकारीलाई अघि बढाउने ताकतले नै आज हामी १४औँ साधारण सभासम्म आइपुग्न सफल भएका छौं ।

२. १३औँ कार्यकालमा अध्यक्षको नेतृत्वमा सम्पन्न भएका प्रमुख कार्यहरू:

विगत एक वर्षको अवधिमा सहकारीले संस्थागत क्षमता विस्तार, पारदर्शिता, सदस्य–सेवा अभिवृद्धि र कर्जा–बचत व्यवस्थापनमा उल्लेखनीय उपलब्धि हासिल गरेको छ । यी उपलब्धिहरू सुधार र स्थायित्वतर्फ उन्मुख संकेत हुन् ।

२.१ सञ्चालक समितिको सेयर पुँजी वृद्धि नीति:

सहकारीको दिगोपना नेतृत्वबाटै सुरू हुनुपर्छ भन्ने मान्यताका साथ सञ्चालक समितिका सदस्यहरूको आर्थिक सहभागिता बढाउन न्यूनतम ५०,००० रुपैयाँ सेयर पुँजी अनिवार्य गरिएको छ । यो नीति पूर्ण रूपमा कार्यान्वयन भएको छ, जसले संस्थाको पुँजीगत आधारमा मजबुती ल्याएको छ ।

२.२सदस्यलाई साक्षीको रोहवरमा ३ लाखसम्म ऋण सुविधा:

पुराना तथा विश्वसनीय सदस्यका लागि सहकारीले भरोसाका आधारमा साक्षीको रोहवरमा ३,००,००० (तीन लाख)रुपैयाँसम्म ऋण उपलब्ध गराउने नीति लागू गरेको छ । यसले लामो समयदेखि सहकारीप्रति समर्पित सदस्यलाई अझ सहज सेवा प्राप्त गर्न सहयोग पुर्‍याएको छ ।

२.३ व्यवसायिक र घरेलु उद्योग कर्जा प्रवाह:

समुदायमा स्वरोजगार र उद्यमशीलता बढाउन सहकारीले घरेलु उद्योग कर्जा, व्यवसायिक कर्जा लगायत प्राथमिकतामा कर्जा लगानी गर्दै आएको छ । स्थानीय उद्यम विस्तारमा यसले सहयोग पुर्‍याएको छ ।

२.४ धितो कर्जाको सीमा १० लाख रुपैयाँसम्म विस्तार:

धितोका आधारमा प्रदान गरिने कर्जा सीमा १०,००,००० (दस लाख) रुपैयाँ पुर्‍याइएको छ। यसले सदस्यलाई व्यवसाय विस्तार, घरायसी आवश्यकता, शिक्षादेखि स्वास्थ्यसम्मका क्षेत्रमा लगानी बढाउन सघाइदिएको छ।

२.५ मल–खादको बिक्री प्रणाली सहकारी मातहत:

कृषि प्रधान क्षेत्रमा किसानलाई सहज पहुँच उपलब्ध गराउन र बजारको अनियमितता हटाउन सहकारीले रासायनिक मल तथा खादको बिक्री सेवा आफ्नै मातहतबाट संचालन गर्न शुरू गरेको छ । यसको प्रभाव उल्लेखनीय रूपमा सकारात्मक देखिएको छ ।

२.६ सम्झौताविहीन डेरी सेवा औपचारिक लिखित सम्झौतामा रूपान्तरण:

पहिले औपचारिकता बिना सञ्चालनमा रहेको डेरी सेवा अब दुवै पक्षको सहभागितामा लिखित सम्झौताबाट सञ्चालनमा आएको छ । यसले पारदर्शिता, स्थायित्व र दुवैको दायित्व सुनिश्चित गरेको छ।ल ।

२.७ घरदैलो ऋण असुली अभियान:

बक्यौता असुली प्रभावकारी बनाउने उद्देश्यले सञ्चालक समिति स्वयं सदस्यको घरदैलो पुगेर कुरा राख्ने प्रणाली अवलम्बन गरिएको छ । यसले पुराना ऋण असुलीमा उल्लेखनीय सुधार ल्याएको छ ।

२.८ किसानलाई बचत र ऋण सुविधा:

डेरीमा संलग्न किसानलाई नियमित बचतमा जोड्दै आवश्यक कर्जासेवा उपलब्ध गराउने कार्यक्रमले उत्पादनमा वृद्धि र आर्थिक सुदृढीकरणमा योगदान पुर्‍याएको छ ।

२.९ सेवा क्षेत्र विस्तार—चार वडामा सेवा सञ्चालन:

हाल सहकारीले निजगढ नगरपालिका–१०, ११, १२ र १३ का बासिन्दालाई नियमित बचत–कर्जा सेवा, सदस्यता विस्तार, सूचना सेवा र अन्य आर्थिक क्रियाकलाप सञ्चालन गरिरहेको छ ।

२.१० विभिन्न अवधिका नियमित बचत योजना:

सदस्यहरूको आवश्यकता र प्राथमिकता अनुसार ६ महिने, १ वर्षे र २ वर्षे बचत योजनाहरू सञ्चालन गरिएको छ । यसले सदस्यमा नियमित बचत संस्कार निर्माण भएको छ ।

३. सहकारीको दर्शन बचत, उत्तरदायित्व र समुदायको समृद्धि:

सहकारीले केवल कर्जा दिने मात्र होइन, सदस्यलाई अनुशासित आर्थिक जीवनशैली तर्फ अभिमुख गराउने कार्य गरेको छ । “बचत गर्ने बानी र नियमानुसार ऋण भुक्तानी बिना जीवनमा स्थिर प्रगति सम्भव छैन।”
अध्यक्षले सभामा यिनै शब्दहरूसहित बचत–संस्कारलाई सहकारीको प्राण–तत्वका रूपमा व्याख्या गरे । सहकारी राष्ट्रको तीन खम्बे आर्थिक नीतिमध्ये एक महत्त्वपूर्ण खम्बा भएकाले यसको संरक्षण, विकास र व्यापकता समुदायकै दायित्व हो।

४. स्वास्थ्य, सचेतना र सदस्यप्रतिको शुभकामना:

मौसमी रोगहरूको जोखिम बढ्ने समय भएकाले अध्यक्षले स्वास्थ्यप्रति सचेत रहन, खानपानमा सावधानी अपनाउन र सम्पूर्ण सदस्यलाई दीर्घायु, स्वस्थ र समृद्ध जीवनको शुभकामना व्यक्त गरे ।

५. अन्तिम धन्यवाद तथा प्रतिवेदनको समापन:

अन्त्यमा अध्यक्षले सहकारीको निम्तो स्वीकार गरी कार्यक्रमलाई सभ्य, भव्य र सफल बनाउन सहयोग पुर्‍याउने सबैलाई धन्यवाद दिए अतिथि, पत्रकार, सुरक्षाकर्मी, संयोजक, कर्मचारी, सदस्य र शुभेच्छुक सबैप्रति कृतज्ञता व्यक्त गर्दै उनले आफ्नो वार्षिक प्रतिवेदन यस शब्दसँगै समाप्त गरे । “हामी सबैको साझा संस्था हाम्रो सहकारी हो । सहकार्य, विश्वास र पारदर्शिताले नै हामीलाई अझ उचाइमा पुर्‍याउनेछ ।
जय सहकारी! नमस्कार ।”