साम्तेन मोक्तानको “फुलैमा डुल्ने भमरा” : नयाँ गित सार्वजनिक गर्ने तयारी

बारा । संगीत प्रेमीहरूलाई छिट्टै नयाँ धुनले स्पर्श गर्ने तयारी भइरहेको छ । गायक सम्तेन मोक्तान र गायिका सुमिना लोको स्वरमा सजिएको गीत “फुलैमा डुल्ने भमरा” अहिले चर्चा र स्रोताहरुका प्रतीक्षाको घेरामा छ ।

गीत केवल धुन मात्र होइन, प्रेम, सौन्दर्य र जीवनप्रतिको ताजगीलाई बखान गर्ने कोशिस हो । शब्द र संगीत स्वयं सम्तेन मोक्तान तामाङले सिर्जना गरेका यस गीतलाई जोगलाल लामाले एरेञ्ज गरेका छन् भने सानुबाबु घिसिङले मिक्स–मास्टरिङमार्फत ध्वनिलाई परिष्कृत बनाएका छन् ।

कलाकारहरूको जीवन्त प्रस्तुति

गीतको भिडियो पनि संगीत जत्तिकै आकर्षक बनाउने कोसिस गरिएको छ । निर्देशक तथा कोरियोग्राफर सञ्जीब लामाको निर्देशनमा तयार भएको भिडियोलाई छायाँकार दुर्गा श्रेष्ठले क्यामेरामा कैद गरेका छन् ।

भिडियोमा प्रनिल घले, याङ्गी दोङ लामा, सञ्जीब लामा र सृजना तामाङले अभिनय गरेका छन् । उनीहरूको रसायनशास्त्र अभिनय र नृत्यले गीतमा नयाँ जीवन दिने अपेक्षा गरिएको छ । साथै, घिसिङ अफिसियल, विशाल आले, अमर तामाङ र कबिर दोङ विशेष कलाकारको रूपमा देखिनेछन्, जसले भिडियोमा अतिरिक्त आकर्षण थप्नेछन् ।

पर्दामार्गिको मेहनत

भिडियोको सम्पादन र रङ संयोजन अनिल बिष्ट प्युठानीले गरेका छन् । सम्पादन कार्य भने जल राप्ती डिजिटल प्रा.लि. मा सम्पन्न गरिएको हो । निर्माण टोलीका अनुसार गीतलाई आधुनिक प्रविधि र कलात्मक दृष्टिकोण दुवैको प्रयोग गरेर तयार गरिएको छ ।

टोलिद्वारा श्रोतासँगको अपेक्षा

“फुलैमा डुल्ने भमरा” नामले नै हाँस्याउली, ठट्यौली  प्रेम र प्रकृतिको रमणीयतामा मानिसलाई फर्काउँछ । शब्दमा भावनात्मक गहिराइ, संगीतमा मिठास र अभिनयमा जीवन्तता मिसाएर तयार गरिएको यो गीतले दर्शक–श्रोतालाई आकर्षित गर्ने अपेक्षा गरिएको छ ।

सम्तेन मोक्तानको आफ्नै युट्युब च्यानलमार्फत सार्वजनिक हुने यो गीतले विशेषगरी युवापुस्तामाझ प्रेमलिला भाव बोकेको आधुनिक गीतको रुपमा स्थान बनाउन सक्ने विश्वास निर्माण टोलीले लिएको छ ।