प्रथम विकल रेग्मी स्मृति जुनियर फुटवल प्रतियोगिताको २ खेलमा वडा नं.१ र ७  विजयी

बारा । प्रथम विकल रेग्मी स्मृति जुनियर फुटवल प्रतियोगिता अन्तर्गत आज विहिवार भएका २ खेलमा वडा नम्बर १ र  वडा नम्ब ७ को टोली विजयी भएको छ ।

पहिलो खेलमा वडा नम्बर १ ले वडा नम्बर १३ लाई १/० मा पराजित गरेको थियो भने दोस्रो खेलमा वडा नम्बर ७ ले  वडा नम्बर २ लाई टाइबे्रक्ररमा पराजित गरेको हो ।

प्रकाश मोक्तानले गरेको एकमात्रै गोल वडा नम्बर १ को जितको लागि पर्याप्त बनेको थियो । प्रकाशले मध्यान्तरपछिको दोस्रो मिनेटमा गरेको गोल निर्णायक बनेको थियो ।

सो खेलको म्यान अफ दि म्याच पनि प्रकाशले नै हात पारेका छन । उत्कृष्ट खेलाडी प्रकाशलाई वडा नम्बर १ का वडा अध्यक्ष मंगले लोप्चन, वडा नम्बर १३ का वडा अध्यक्ष सूर्यबहादुर घलान, वरिष्ठ पत्रकार गोकुल घोरसाइने, स्व. विकल रेग्मीकी आमा कमला रेग्मीले १ हजार नगद र ट्रफी प्रदान गरेका थिए ।

जितसंगै वडा नम्बर १ प्रतियोगिताको सेमिफाइनलमा प्रवेश गरेको छ । त्यसैगरी वडा नम्बर ७ ले भने जितको लागि अन्तिम समयसम्म नै संघर्ष गर्नुपरेको थियो । निर्धारित समयमा दुबै टोलीले १/१ गोलको बराबरी खेलेपछि टाइबे्रक्ररमा धकेलिएको खेलमा वडा नम्बर ७,  ५/० ले विजयी भएको हो ।

मध्यान्तरपछिको ७ औं मिनेटमा उज्जल मगरको गोलमा अग्रता बनाएको वडा नम्बर ७ विरुद्ध वडा नम्बर २ का पुष्कर क्षेत्रीले लगत्तै गोल फर्काएर खेल बराबरीमा पुर्‍याएका थिए । सो खेलको म्यान अफ दि म्याच वडा नम्बर ७ का राम आर्यलले हात पारेका छन ।

आर्यललाई वडा नम्बर ७ का वडा अध्यक्ष टेकबहादुर लामालगायतले पुरस्कार र ट्रफी प्रदान गरेका थिए । भोलिको पहिलो खेलमा वडा नम्बर ३ र ४ तथा दोस्रो खेलमा वडा नम्बर ८ र ११ बिच प्रतिस्पर्धा हुने आयोजक निजगढ फुटबल क्लबका शम्भु थापाले  जानकारी दिए ।

निजगढ नगरपालिकाको आयोजनामा निजगढ ९ स्थित शहीद हिरालाल रंगशालामा शुरु भएको प्रतियोगिताको विजयी टोली ५० हजार नगद पुरस्कार र ट्रफी प्राप्त गर्नेछ ।