बंशिराम अनाथालयमा खानेपानी फिल्टर जडान

रूपेश यादव/रौतहट । रौतहट जिल्लाको गरुडा नगरपालिका स्थित श्री बंशिराम जयसवाल अनाथालयमा खानेपानी फिल्टर जडान गरिएको छ । स्वराज आन्दोलनका वीर शहीद राममनोहर यादवको सातौं शहादत दिवसको अवसरमा मिति २०८१ भाद्र १५ गते, अनाथालयमा शुद्ध खानेपानीको व्यवस्था सुनिश्चित गर्न यो महत्वपूर्ण कार्य सम्पन्न भएको हो।
समारोहको आयोजना गरि, यस विशेष अवसरलाई सम्मान गर्ने उद्देश्यले स्व. राममनोहर यादवको योगदान र बलिदानलाई स्मरण गरिएको छ । यस अनाथालयको स्थापनाकालदेखि नै यहाँ रहेका बालबालिकालाई स्वच्छ खानेपानीको आपूर्ति एक प्रमुख आवश्यकता रहँदै आएको थियो । यसै आवश्यकता पूर्ति गर्ने क्रममा स्व. राममनोहर यादवको स्मृतिमा अनाथालयमा आधुनिक खानेपानी फिल्टर जडान गरिनु, त्यहाँका बालबालिकाको स्वास्थ्य सुरक्षाका लागि एक महत्वपूर्ण कदम सावित भएको छ ।
यो कार्यप्रति संस्थापक बंशिराम जयसवालले गरूडा नगरपालिका -७ भिन्डावर निवासी युवा नेता रामलाल यादवलाई हार्दिक धन्यवाद व्यक्त गरेका छन् । जयसवालले रामलाल यादवको सरल स्वभाव र समाजसेवामा रुचि रहेको कुरा उल्लेख गर्दै, समाजसेवाको यो महत्वपूर्ण कदममा सहभागी बनेका सबैलाई धन्यवाद दिए । “रामलाल यादवको योगदानलाई हाम्रो संस्था सदैव स्मरण गर्नेछ र यस प्रकारका समाजसेवात्मक कार्यले आगामी दिनमा पनि निरन्तरता पाउनेछ,”  जयसवालले भने।
सो समारोहमा स्थानीय समाजसेवी, राजनीतिक व्यक्तित्व, र सर्वसाधारणको उपस्थिति रहेको थियो । अनाथालयमा आयोजित कार्यक्रममा वक्ताहरूले स्व. राममनोहर यादवको बलिदान र योगदानको महत्त्वलाई विशेष जोड दिएका थिए । कार्यक्रमका दौरान, अनाथालयका बालबालिकाले पनि विविध सांस्कृतिक प्रस्तुति दिएका थिए, जसले सम्पूर्ण वातावरणलाई हर्षोल्लासमय बनायो ।
सोहि अवसरमा समाजका विभिन्न व्यक्तिहरुले पनि आफ्नो धारणा राख्दै, खानेपानीको सहज पहुँच बालबालिकाको स्वास्थ्य र विकासका लागि अत्यावश्यक रहेको कुरामा जोड दिए । अनाथालयका संचालकले भविष्यमा यस्ता थप समाजउपयोगी कार्यहरू गर्न अन्य व्यक्तिहरूलाई पनि प्रेरणा प्राप्त हुने विश्वास व्यक्त गरे ।
श्री बंशिराम जयसवाल अनाथालयको यस नवीनतम पहलले स्थानीय समुदायमा राम्रो उदाहरण प्रस्तुत गरेको छ । यसले स्थानीय बासिन्दा र शुभचिन्तकहरूको सहयोगमा अनाथालयको भविष्यलाई अझ उज्यालो बनाउने विश्वास पनि व्यक्त गरिएको छ ।