बैशाख ३ गते पुरानो निजगढमा कुलपूजाको आयोजना हुने

निजगढ । निजगढ नगरपालिका–४ कछडिया टोलमा यस वर्ष २०८३ सालको बैशाख ३ गते परम्परागत कुलपूजा आयोजना हुने भएको छ । ब्राह्मणस्थान मन्दिर समितीले आज आइतबार बसेको बैठकले कुलपूजा मनाउने निर्णय गरेको हो ।

पुरानो निजगढस्थित ब्राह्मणस्थान मन्दिरमा आयोजना हुने उक्त पूजाको सम्पूर्ण तयारी सुरु गरिएको ब्राह्मणस्थान मन्दिर समितिले जनाएको छ ।

समितिका अनुसार प्राचीन कालदेखि निरन्तर रूपमा मनाउँदै आएको यस कुलपूजाले स्थानीय धार्मिक आस्था र सांस्कृतिक पहिचानलाई जगेर्ना गर्दै आएको छ । विशेषगरी चौधरी तथा थारु समुदायको मुख्य धार्मिक परम्पराका रूपमा स्थापित यस पूजाले समयसँगै सम्पूर्ण टोलवासीलाई एकताबद्ध बनाउने साझा पर्वको रूप लिएको छ ।

कुलपूजामा आ–आफ्नो कुलदेवताको स्मरण गर्दै विधिपूर्वक पूजा–अर्चना गरिन्छ । यस अवसरमा परम्परागत भाकल, बलि (कतिपय स्थानमा प्रतीकात्मक), प्रसाद वितरण तथा सामूहिक पूजा विधि सम्पन्न गरिने चलन रहेको समितिका एक सदस्यले बताएको छ । पूजामा सहभागीहरूले आफ्नो कुल, परम्परा र पूर्वजप्रति श्रद्धा अर्पण गर्नुका साथै आगामी दिनहरू सुख, शान्ति र समृद्धिको कामना गर्ने गर्छन् ।

स्थानीय बासिन्दाका अनुसार कुलपूजा केवल धार्मिक अनुष्ठान मात्र नभई सामाजिक एकता र सांस्कृतिक संरक्षणको महत्वपूर्ण माध्यम पनि हो । यसले पुस्तौँदेखि चल्दै आएको परम्परालाई नयाँ पुस्तामा हस्तान्तरण गर्ने अवसर प्रदान गर्नुका साथै समुदायबीचको आपसी सम्बन्धलाई थप मजबुत बनाउने काम गर्दछ ।

ब्राह्मणस्थान मन्दिर परिसरमा आयोजना हुने यस कार्यक्रमले गाउँघरमा उत्सवको माहोल सिर्जना गर्ने अपेक्षा आयोजकले गरिएको छ । पूजाका अवसरमा टोलभरिका घरपरिवार एकत्रित भई सरसफाइ, सजावट तथा व्यवस्थापनमा जुट्ने परम्परा रहेको छ, जसले सामूहिक श्रम र सहकार्यको भावनालाई पनि प्रष्ट रूपमा झल्काउँछ ।

समितिले सबै श्रद्धालु तथा टोलवासीलाई उपस्थित भई धार्मिक तथा सांस्कृतिक महत्व बोकेको यस कुलपूजालाई भव्य र सभ्य रूपमा सम्पन्न गर्न आग्रह समेत गरेको छ । साथै, यस्ता परम्परागत पर्वहरूले हाम्रो मौलिक संस्कृति संरक्षण र पहिचान जोगाउन महत्वपूर्ण योगदान पुर्‍याउने विश्वास व्यक्त गरिएको छ ।